Milan Junior Camp, përfundon edicioni i I në Kosovë

English

Shqip

Kërkim i avancuar

E Premte 18 Maj 2012

Moti

Tirana

21°

Arkivi

Milan Junior Camp, përfundon edicioni i I në Kosovë

Publikuar: Dhjetor 02,2011 - 20:46

Prishtinë - Pasioni, dëshira dhe ëndrra e futbollistëve të vegjël në Kosovë u demonstrua ndjeshëm në ditët prishtinase të futbollit, pikërisht me edicionin e parë të projektit më ambicioz për ndjesinë e këtyre fëmijëve me futbollin, Milan Junior Camp. Një atmosferë madhështore ishte mbyllja e këtij edicioni të parë në Kosovë, i cili ka gjetur një interesim të jashtëzakonshëm të mediave dhe qytetarëve të Kosovës.

Me bekimin e ish-kapiten Barezit të dielën, por edhe me mesazhin premtues për fëmijët të zv/Presidentes së grupit Taçi-Oil, Anika Taçi, për rrugën e gjatë të këtij bashkëpunimi, Prishtina priti këtë kamping për 5 ditë me radhë. Fusha e gjelbër e stadiumit të qytetit në Prishtinë ishte mbushur që në mesditë nga familjarë të shumtë të fëmijëve pjesëmarrës, të cilët prisnin me shumë padurim, por edhe me shumë emocion përzgjedhjen e pesë talenteve më të mirë, të cilët do të marrin pjesë bashkë me fëmijët nga e gjithë bota në Milan Day.

Jo vetëm 200 fëmijët pjesëmarrës, por edhe të afërmit e tyre kishin veshur fanellat kuq e zi të kampionit të shumëfishtë të Italisë. Plot 200 futbollistë të vegjël në Kosovë kaluan ditë tepër aktive nën suportin teknik të klubit të Milanit, në kuadër të projektit, që grupi Taçi-Oil prej vitesh realizon në Tiranë me partnerin e tij AC MILAN, së fundmi, të implementuar edhe për fëmijët në Kosovë.

Ditë intensive stërvitjeje dhe që në Prishtinë përfshinë një staf teknikësh të specializuar të Milanit, me ata fëmijë, që ishin pjesë e kampingut të parë Milan Junior Camp. Lëvizje harmonike, kontakte me topin detaje teknike, por edhe puna në grup ishin pikat e punës, që trajnerë të specializuar të shkollës së Milanit, zbatuan në trajningun e Prishtinës. Një ndjesi e re, një diçka ndryshe në këto ditë për të gjithë ata fëmijë pjesëmarrës, dhe jo vetëm.

Milan Junior Camp në Prishtinë shpërndau një tjetër jehonë dhe rriti akoma më shumë pasionin e fëmijëve për të qenë pjesë e një klubi kampion. Në mbyllje te kampingut, presidenti i grupti Taçi-Oil, Rezart Taçi, u përcolli mbarë futbollistëve të vegjël pjesëmarrës dhe premtues në Kosovë, se ky projekt do të vazhdojë gjatë, si nje prioritet konstant i grupit Taçi-Oil me klubin e Milanit, pikërisht për ndërthurrjen e traditës dhe pasionit të tyre me përvojën e jashtëzakonshme të një klubi kampion, si Milani. Për presidentin e grupit Taçi-Oil, Rezart Taçi, premtimi për të gjithë fëmijët e Kosovës ishte konkret: "Shumë prej tyre do të kenë të gjitha mundësitë të veshin fanellat e këtij klubi gjigand si Milani".

"Kjo dëshirë e juaj, ky pasion i juaj në këtë kamp, na bën më të përgjegjshëm, që ta organizojmë sa më mirë këtë kamp dhe të vazhdojmë të impenjohemi në ditët dhe në vitet në vazhdim. Unë mendoj, që krijimi i mundësive për të rritur dhe për të realizuar ëndrrat tuaja, është një nga gjërat më të rëndësishme që ne duhet të bëjmë. Prandaj, ne sot impenjohemi, që këtë kamp ta zhvillojmë edhe në të ardhmen për t'i dhënë mundësi të gjithë fëmijëve të dashuruar me këtë sport, mbase një ditë do të mbërrijnë në skuadrën e madhe të Milanit, pse jo në kombëtaren shqiptare apo atë kosovare"- u shpreh Presidenti i Grupit Taçi Oil, Rezart Taçi.

Për mbarë fëmijët dhe prindërit, dashamirësit e futbollit në stadiumin e Prishtinës, një mesazh përcolli edhe koordinatori i Milanit për këtë projekt, Marcho Schembri, i cili vuri në dukje rëndësinë e këtij projekti, që gjen suport të jashtëzakonshëm prej vitesh nga partneri kryesor i Milanit, grupi Taçi-Oil.

"Ju sjell këtu për të gjithë ju, përshëndetjen e klubit të Milanit dhe vetë presidentit Berluskoni, të administratorit të deleguar Galiani si dhe kapitenit Ambrosini. Gjatë këtyre ditëve keni qenë fantastik dhe jemi ndjerë të gjithë shumë mirë në këtë qytet të mrekullueshëm. Ditë intensive, ku trajnerët tanë kanë evidentuar jo pak talentë në këtë kamping. Do doja të falenderoja shumë përzemërsisht presidentin e Grupit Taçi Oil, Rezart Taçi dhe familjen e tij, që besuan dhe mundësuan këtë projekt për ju, këtu në Kosovë. Nga Shqipëria ai nuk ka hezituar asnjëherë, ai gjithmonë ka mbështetur Milan Junior Camp"- u shpreh koordinatori i Milanit, Schembi.

Ka edhe risi në këtë mbyllje fantastike të kampingut: trajnerët italianë janë shprehur të kënaqur me fëmijët pjesëmarrës nga Kosova, duke i emëruar madje ata edhe me emra të lojtarëve të njohur të Klubit Milan. Fëmija më i vogël pjesëmarrës në këtë kamp, Ard Desku, mori edhe fanellën me firmën e sulmuesit të mirënjohur të Milan Zllatan Ibrahimoviç.

Ndërsa një nga vajzat pjesëmarrëse, Qëndresa Krasniqi është pagëzuar me emrin Pato nga trajnerët italianë, të cilët janë mrekulluar me talentin e saj. Ndërkaq, një nga futbollistët e vegjël pjesëmarrës, që ka lënë jo pak mbresa, ishte 12-vjeçari, Edon Zhegrova i cili është përzgjedhur edhe si lojtari më i mirë i edicionit të parë të Milan Junior Camp, tek i cili pritet që të përfaqësojë Kosovën me sukses në arenën ndërkombëtare.

Vetë nëna e Edonit ka falënderuar nga zemra Presidentin e Grupit Taçi Oil për mundësinë që i ka dhënë familjes, që të prezantojë talentin e djalit të tyre. Emocionet e saj më pas nuk i shmangen lotët, teksa është shprehur e bindur se një ditë djali i saj, do të jetë nga nga shtyllat e futbollit kosovar dhe shqiptar. Edoni së bashku me katër talentë tjerë Muhamet Hyseni, Veton Tusha, Agon Hajredini dhe Leart Bilalli do të marrin pjesë edhe në Milan Day në San Siro. Milan Junior Camp Kosova ul siparin dhe hap kështu rrugën e artë të mundësive edhe për fëmijët në Kosovë, për të qenë pjesë e kampionëve.

Gerti Çarçani

VIDEO

FOTO